加拿大H&R Block最新調查顯示，財政因素在婚姻及同居關係中佔重要角色。73%受訪者認為，「好多情侶或夫妻因為財政原因而選擇繼續一齊」。

調查指出，八成加拿大人認為拍拖或結婚比單身更「慳錢」。另外，近四分之一（23%）受訪者表示，比起傳統婚姻，更喜歡「五年可續期的關係合約」。

婚姻的「實際性」亦成焦點。四成加拿大人認為婚姻主要係「為咗計劃或已經有小朋友嘅家庭」。男性比例（45%）高於女性（36%）。同時，83%受訪者認為，伴侶往往因為小朋友而選擇繼續一齊。

NerdWallet Canada財務專家 Clay Jarvis 指出，婚姻係一個「重大財務決定」，提醒情侶要先檢視自身財政狀況。他舉例，屋企、育兒、交通等開支會迅速累積，必須做好財務規劃。

調查亦涉及稅務公平問題。逾半（57%）加拿大人認為已婚或同居伴侶享有比單身人士更多稅務優惠；63%更認為單身人士應獲得更多稅務減免，因為佢哋冇伴侶分擔開支。

至於婚前協議（Prenup），62%加拿大人表示，如果伴侶收入或資產明顯較高，願意簽署協議。TD Bank於2026年2月的調查更顯示，超過一半（51%）加拿大Gen Z受訪者希望伴侶簽Prenup，遠高於全國平均28%。

Jarvis 強調，伴侶之間要坦誠溝通財政壓力，避免衝突。「開放同誠實係最好嘅做法。如果有財政問題，大家可以一齊解決，而唔係築起防禦牆，否則只會令關係更困難。」

🔗資料來源: https://globalnews.ca/news/11743739/relationship-or-single-finances-survey/