近日一宗發生於大溫本拿比Costco的「拴狗事件」，在網絡上迅速發酵，引爆全城熱議。事緣有兩位華人顧客因Costco不容許寵物進入，便將秋田犬用短繩拴在SUV車尾，引來BC SPCA介入調查，並引起全網聲討。

然而，事件真相是否如網民所見那樣簡單直接？涉事主人在沉默數日後，終於忍無可忍，主動開腔講出當日真相及個人感受，試圖釐清外界對其誤解。

當事人還原事發經過：冇離開一小時，狗冇中暑

據當事人自述，事發於5月5日，她當日與友人帶狗狗行完SFU山，順路到Costco買嘢：「入內購物時間約40分鐘，並非網傳嘅一小時以上。」當日溫哥華氣溫僅約20度，「我著住外套，冇覺得炎熱」。

她續指，選擇將狗綁喺車尾，係考慮該處空氣流通、相對陰涼，比鎖狗入車內更安全。她離開前亦特意觀察狗狗狀況，並無異常。

對網民批評表示理解　但拒絕被「情緒審判」

「我唔係想對抗邊個，只係希望大家知道，不完整片段下，好易造成誤判。」她坦言，明白路人及網民出於善意關心狗狗，但有部分帳號將事件渲染成「暴晒虐狗」，加入過度情緒化用詞，令事件脫離事實。

她強調，狗狗對她而言唔止係寵物，「係家人」，一直為狗準備新鮮食物、魚肉補品，平時盡量唔留狗狗獨自在家。雖然今次處理方式有值得改進之處，但從未有惡意。

SPCA開罰$300　事件升溫引種族、性別批評

Daily Hive報道指，BC SPCA已對事件展開調查，當事人亦被罰款$300元。她表示願意配合機構改進安排，但網上部分評論開始針對其背景、性別、財富等延伸批評，與事件本身無關，令人心寒。

「我係一個普通養狗人，冇諗過會變成主角。佢依然開心咁搖尾巴，冇怕過我，因為我從來冇傷害過佢。」

華人網民反應兩極：有人理解，有人不買帳

有網友留言表示同情：「我覺得佢係愛狗嘅人，否則唔會帶佢周圍走。做法可以改善，例如一人購物一人留狗。」

亦有網民質疑：「你解釋咁多，似乎只係想大家停止批評，但行為往往比言語更誠實。」

更有網友中立分析：「狗確實冇受傷，但外人會諗，你平時係咪都係咁對待佢？」

你點睇？狗主犯錯，應唔應該被原諒？留言講你嘅睇法。