感恩節長週末期間，多倫多（Toronto）市中心街道突然「鋪滿白雪」，令不少市民以為冬天提早報到。不過，氣溫仍維持在攝氏十多度，這場「雪景」其實係場誤會。

星期日，多個市中心路口，包括King與Victoria交界，以及Bay與Temperance一帶，被厚厚「白雪」覆蓋，令不少途人以為錯過咗一場突如其來嘅暴雪。

原來，呢場「雪」係為Nissan拍攝廣告而設嘅人工造雪，場景逼真得令人以為真係落雪。有網民留言：「幾時落雪？我住喺多倫多都冇見過雪。」亦有人笑言：「唔等多個星期拍，真雪就免費有啦。」

部分人甚至懷疑影片係AI生成，留言：「太真啦，睇到都有啲創傷後壓力。」

雖然呢場「假雪」引起唔少冬季焦慮，但根據天氣預測，多倫多未來兩星期日間氣溫仍會維持雙位數，夜間最低約攝氏5度，真正嘅寒冬仲有排先到。

🔗資料來源:   https://www.blogto.com/film/2025/10/downtown-toronto-covered-snow-dont-freak-out/