到底幾多錢先算「富有」？《Financial Post》早前針對全國讀者進行調查，發現對「有錢人」的定義，唔同世代之間有巨大鴻溝。

👉🏻近半人認為要有$500萬先叫富有

調查共訪問了1,868名加拿大讀者，當中近一半認為個人淨資產最少要達$500萬，先可稱得上「有錢人」。但對於Z世代（00後）而言，只要存款達到$100萬，已經覺得自己富有。

原因其實好簡單——愈後生，愈覺得儲錢難。

一名Z世代受訪者直言：「我同我父母嗰陣賺嘅錢差唔多，但屋價係佢哋年代嘅三倍，利率又高，生活開支更唔在講。甚至因為經濟壓力，我哋唔敢生小朋友。」

👉🏻最大遺憾：太遲開始理財！

41.2%受訪者表示，最大財務遺憾係「冇早啲開始做理財規劃」。另外，22.6%人就表示錯過咗入市良機。

有不少人後悔當年投資過於保守，太早沽貨、買錯股票、冇做資產多元化，導致財富增值機會流走；亦有唔少人表示因為長期負債，冇本錢投資，錯失置業致富機會。

基於上述經歷，有34.2%受訪者表示，2025年打算展開投資計劃——當中20%會投資少於$1萬，加31.3%更計劃投入超過$10萬。

👉🏻遺產觀念轉變：唔一定全留畀子女

與此同時，加拿大人對「遺產應否全留畀下一代」嘅睇法亦有轉變。

只有12.1%表示會將所有財產留畀子女，反而有18.1%人明言唔會留一分一毫，希望子女自立，更有25.8%人會留25%財產，18.8%則會分一半，而15.6%表示自己根本冇打算有下一代。

👉🏻有錢人嘅煩惱：錢多，但想走？

據《Financial Post》另一份調查指出，加拿大愈來愈多高淨值人士有意「移民走人」。在擁有淨資產超過$100萬元的富豪中，28%表示比起上一次聯邦大選，更有離開加拿大嘅打算。

56%表示對生活質素感到失望，45%因經濟前景而想走。專家指出，與其話係政見問題，不如講成係「加稅壓力」。

👉🏻為何他們想走？

Cole & Associates創辦人Carolyn Cole指出，加拿大富人越來越難應付層層疊疊的稅制改革。「唔係佢哋唔愛國，而係計過數後，發現移民可以慳更多，搵得更多。」

她話，富人唔一定會徹底離開加拿大，而係將資產轉移海外以減低稅負。

👉🏻「唔走嘅人」仍源源不絕湧入

不過，加拿大也唔係咁易變「富人沙漠」。根據瑞銀集團報告，預計到2028年，加拿大擁有$100萬以上資產嘅人數將上升至超過240萬人，增幅達21%。

資深財務顧問Tina Tehranchian指出：「無論如何，加拿大對全球富豪依然具有吸引力。生活質素高，言論自由，有錢人都鍾意！」

你心目中，幾多錢先算係「有錢人」？你又打算幾歲退休？歡迎留言分享！