當一份正職人工已經難以應付每日開支，加拿大人愈來愈多選擇「斜槓人生」，兼職副業變成新常態。根據Capital One Canada最新報告，加國國民最常見的七大副業出爐，當中唔少仲係可以「一部電腦在手，工作唔使出門」！

1｜自由工作者（Freelancer）

當中以平面設計最搶手。無論係設計logo、網站圖像、宣傳單張，定係剪片、搞社交媒體排版，只要你有一技之長，就有市場。此外，如果你熟悉SEO、肯做資料搜集或擅長編輯寫稿，更可發展成專業內容創作者。

2｜網店電商生意

喜歡手作的朋友，不妨考慮開網店售賣手工藝品如首飾、香薰蠟燭等。即使無製作技能，單單清理屋企二手物品，喺Facebook Marketplace或eBay出Let都係「搵真銀」方法。

3｜送餐／送貨司機

外送服務如Uber Eats、DoorDash 或Amazon Flex，不但時間彈性大，啱晒想搵快錢又唔想綁死嘅人。只要有車、有GPS、有時間，即刻開工都無問題。

4｜寵物保姆／遛狗達人

疫情後，加拿大養寵物人數急升，唔少返Office嘅主人都需要人幫手照顧狗狗。只要你唔怕狗又有責任心，註冊成為寵物保姆或代客遛狗都可月賺幾百甚至上千加元。

5｜兼職導師／家教

擅長某項學科或樂器？教補習或興趣班係一個穩定又有滿足感嘅選擇。仲可以視像授課，唔受地點限制。

6｜遠端虛擬助理（VA）

組織力強？你可以搵客戶幫佢哋安排行程、處理電郵、打報表，甚至幫手做簡單Marketing。呢類工作近年需求大增，係唔少全職媽媽或freelancer熱門選擇。

7｜健身教練／運動導師

喜歡運動又想幫人改善體能？成為瑜伽導師、有氧舞導師或健身教練，不但收入不俗，仲可以將興趣變收入來源。

📝編輯語：

正所謂「搵錢無罪，捱貴通脹」！喺目前物價持續上漲嘅環境下，加拿大人都開始精打細算、主動開源。如果你都諗緊搵副業，不妨從自己興趣或專長入手，話唔定下一個轉機就喺你手上！